Jaiak sarean

Euskal jaien gaineko informazio asko dago

Uda badatorrela eta, jada burua Sanjuan eta Sanpedrotan dugu, astebeteko kontua baita gurpil zoroaren abiatzea. Batzuk ez dira gurpiletik jaitsiko iraileko Sanantolin edo urriko Sanfaustoak pasa arte. Eta etxean Interneterako konexioa duenak badu laguntza ederra ziberespaziotik asteburuko planak egiteko. Badira webgune dexente Euskal Herriotako jaiei buruzko informazioa ematen dutenak: jaien direktorioak eta herriotako jaien gaineko informazioa ematen duten webgune pertsonal zein instituzionalak.

Lehendabiziko multzoan bi helbide ditugu, Euskal Herria festaz festa ezagutzeko ustea dutenentzat aproposak. Come.to/jaiak helbidean herrialdearen arabera bila ditzakegun euskal festen direktorio bat aurkituko dugu. Bestalde, bere domeinu propioa duen Jaiak.net webgunea euskal jaien portala izateko asmoarekin ezarri dute bere egileek. Euskal jaien beste aurkibide bat badu, herrialdearen eta herriaren arabera bilatzeko, baita mobidaren, tokiaren eta dataren arabera. Festazale amorratuentzat Rally atalean festarik festako ibilbideak proposatzen dituzte. Webgune honek erdarazko bertsioa du Fiestas.net domeinuan.

Herri zehatz bati lotutakoak herri askotxotan badira Euskal Herriko punta batetik bestera, Balmasedatik Eskiulara esaterako. Lekeitioko Ugutz Txopiteak Sanpedro eta Sanantolinen gaineko informazioa jarri du bere webgune pertsonalean, bere ikuspuntutik ikusita, noski, eta laster ospatuko den Hondarribiko alardean emakumeen aldeko iritziak biltzen ditu beste internauta batek berean. Sanfermin jai erraldoiek webgune erraldoia dute Kukusumusuren eskutik eta Munduko Gorazko Txapelketa antolatzen duten Erromotarrek ere badute eurena.

Jaiak Euskal Herrian
www.come.to/jaiak
Jaiak.net
www.jaiak.net
Balmaseda
www.balmaseda.net/ejaiak.html
Eskiulako Bestak
www.chez.com/esquiule
Hondarribiko Alardeari buruz
http://i.am/irundarra
Sanfermin
www.sanfermin.com
Erromo
http://aldea-global.gordexola.net/erromojaiak/
Lekeitio
www.arrakis.es/~ugutz