Sektak online

Sarea erabiltzen dute jendea harrapatzeko

Sareen sarea modu merke eta eraginkorra da edonolako mezuak zabaltzeko, baina halaber, leku egokia izan daiteke mezu gaiztoen arriskuez ohartarazteko. Munduko sektarik garrantzitsuenak sarean ere badaude. Baina izengabeko internauta batek webgune bat zabaldu du Espainian diren sektak zertan diren azaltzeko, El sorprendente mundo de las sectas izenekoa.

Euskal Herrian dauden gehienak ere bertan daude eta haien gaineko informazio bila bagabiltza bertara jo dezakegu. Izan ere, egileak dioenez bere webgunearen xedea informatiboa da, sekten gaineko azterketarik egin behar duenarentzat eta testigantza kritikoak ematea, sektetan gizakiak nola kontrolatuak diren erakusteko.

Evangelistak, Jehovah-ren lekukoak, humanismoa, Dianetica, Moon, Nueva Acropolis eta beste talde askoren gaineko informazioa aurkituko dugu bertan. Sektak ezezik, horien teknikak erabiltzen dituzten salmenta sistemak eta iruzurrak ere salatuak dira webgunean, Amway taldea kasu.

Interneti esker teoria milenaristak asko zabaldu eta dira. Mundua milurteko berriaren hasierarekin amaituko dela diotenak dira horiek. Oso famatua izan zen duela bi urte euren burua hil zuten Heavens Gate sektako kideen kasua, Hale Boop kometaren etorrerak salbatuko zituelakoan. Giza klonazioa eskaintzen duen beste talde bat dago, Clonaid, kide-bezeroari dirutza ederra kobratuta, noski.

Helbide interesgarriak.

Bi hauek aukeratu ditugu. Bertatik lotura asko daude sekta bakoitza zer den eta zertan den azalduz eta sekten guneetara bertara.

El sorprendente mundo de las sectas
http://moon.inf.uji.es/~roc/

Informe sobre sectas
http://www.geocities.com/Heartland/Acres/1142/main.htm