Star Wars berria Sarean

Badena dena bada, informazioaren munduari dagokionez, Interneten ez dagoena ez da. Mundu zabaleko sarean jadanik Egunkaria sartu bazaigu, nola ez dira egongo zinema superprodukzioak? Hastear dagoen urtean, Barkatu Ama berriaren eta gure zibertxoko honen agerpenaren ondoren, beste gauza askok emango dute zeresanik mundu mailan eta denek izango dute beren isla Interneten.

George Lucasen filme berria izanen da datorren urteko Titanic. Star Wars filmarekin hasi zen trilogia amaitu ostean, Lucasi bururatu zitzaion beste hiru atal eranstea. Baina kontakizunean, denboran, Star Wars baino lehenago kokatuko dira atal berriok. Ingelesez prequel edo prekuela izango dira atal hauek.

Lehenengo atal honek Episode I, The Phantom menace izena eramango du. Filmaketa amaituta dago eta abuztua aldean estreinatzea iragarrita dago. Baina Star Warsen webgune ofizialean informazio asko dago filme berriaren eta etorriko diren beste bien gainean. Aktoreak, istorioa, liburuak, parafernalia... Filmaren trailer edo iragarkia ere ikusteko aukera ematen dute bertan. Jarraitzailerik amorratuenek berau ikustearren 15.000 pezeta ordaintzera heldu dira eta guk Sarearen bidez debalde ikusteko aukera daukagu hainbat formato ezberdinetan. Hori bai, zineman baino kalitate kaxkarragoan.

Star Trek-en kopurura heltzen ez bada ere, Lucasen sagak ere baditu milaka jarraitzaile amorratu Sarean. Guk hiru webgune aukeratu ditugu.

http://www.starwars.com/
http://scifi.simplenet.com/starwars/prequels/general.html
http://headlines.yahoo.com/Full_Coverage/Movies/star_wars__episode_i___the_phantom_menace/index.html