NETxploitation

Sareko ibilera inozoak Shaft-en bila

Sareko nabigazioak badu portu ezezaguneranzko nabigazioaren irrika eta misterioa. Badakigu nondik hasten garen, baina ez dakigu noraino eramango gaituen nabigazioak. Printzipioz, loturetan etengabe klik eginez eta loturen katea eten gabe, baliteke gure ibilaldia Egiptoko historiaren gaineko web batean hasi eta Disneyrenean amaitzea, Vaticanoko web ofizialetik eta webcam porno batetik igaro ostean.

Interesgarria litzateke jakitea horrelako esperimenturik inongo bitakora kaieratan idatzi duenentz. Nabigazio erratiko horretan beti dago gure arreta erakar dezakeen loturaren bat eta konturatu orduko gure bilaketaren haria guztiz galduta dugu, zeren bila ari ote ginen zeharo ahantzita. Batzuetan guk nahita ezer egin gabe harian gaude berriro eta beste batzuetan irteera puntura heldu gara atzera. Baliteke bat batean gure ibilerari koerentzia emango dion ustekabeko emaitzaren bat lortzea.

Hori gertatu zitzaidan iragan astean, urrunago gabe. Curtis Mayfield handiaren atzetik abiatu nintzen, haren abesti bat Napster-etik jaitsi ostean (bai, aitortzen dut). Abestiak Shaft Theme zuen izena, eta izenak zein musikak 70ko urteetako polizietako film bat ekartzen zidaten gogora. Laster, nire oroimen urria freskatu zuten dozenaka lotura agertu zitzaizkidan google bilatzailean: Beltzak protagonista izaten hasi ziren Blacksploitation generoko pertsonaia ezaguna zen Shaft, ebanozko polizia gogorra.

Haren gainean gehiago jakin nahi duenak laster jasan beharko du Shaftmania. Izan ere, web sorta ederra bisitatu eta bertsio berri bat badagoela jakin nuen. Geroztik jakin dut egunotan prentsan Shaft berria beste gairik ez omen dagoela. Baina non bizi ote naiz? Azkenik, pantailak ia itsutu nauen arren oraindik ez dut argitu nor izan zen Shaft-erako musikaren sortzailea, paperetan Mayfielden izena barik Hayes batena aipatzen baitute. Dakienak, otoi, bidal beza mezu bat.

Shaft
members.aol.com/PizarroD/shaft
www.bestweb.net/~hmcnally/shaft
Film berria
www.shaft-themovie.com