Jokoak sarean

Beste batzurekin online doan lehiatzeko

Ez da beharrezkoa gaupasak, mendia eta hondartza gustoko ez dituen animalia bitxia izatea. Lan kontuengatik, ikasketak direla eta, edo beste edozein arrazoi dela medio, uda honetan haiengandik urrun egon behar baduzu, ordenagailuan eta ziberespazioan aurki dezakezu noizbehinka aisialdirako aukeraren bat. Sarea ez da bakarrik negurako eta udan haren alderdirik ludikoenaz goza dezakegu.

Makina bat online joko daude, era askotakoak. Arcade estilokoak eta ekintza jokoak Java aplikazioak izan ohi dira eta pentsatzekoak aldiz DHTML eta antzeko hizkuntzetan idatzita daude gehienetan. Javan eginak, Jump, Asphyx eta Rollerboy aurkituko ditugu Playground webgunean. Funnyland-en, berriz, arcadeak, puzzleak, kiroletakoak, trebetasun jokoak, umeentzakoak edo eta mahai jokoak aurkituko ditugu gaztelaniaz. Shockwave sistema erabiltzen du Gameland webguneak eta bertan150 inguru joko daude inoren esku, besteak bezalaxe debalde goza baitaitezke, eta sariak irabazteko aukera ere izango dugu bertan. Antzeko aukera emango digu Sony etxearen The Station guneak ere.

Martiztarren jokoak baino, mahai jokoak topa daitezke Galaxiworld kasino birtualean. Musutruk edo diru trukean blackjack, ruleta, fruten makinak, bideo poker, jackpot eta beste hainbat joko daude, 40 inguru, denak gaztelaniaz. Alienigenak hiltzea gustoko badugu, berriz, ondo pasatuko dugu Mars 2200 jokoarekin. Aldiz, abentura eta estrategia jokoak nahiago baditugu iReal World izango da gure aukerarik onena.

Playground
www.litecom.se/java/
Funnyland
www.funnyland.net/Juegos/
Gameland
www.game-land.com
The Station
www.station.sony.com
Galaxiworld
www.galaxiworld.com/es/
Mars 2200
www.dry.net/~inworld/apps/Mars2200.html
iReal World
www.ireal.com