Harrigarriak

Webgunerik arraroenak, zikinenak eta garratzenak

Interneten alderdi serioaz aritzen gara askotan, hura bezain handia den alderdi ganorabakoari erreparatu barik. Zentzurik ez duten webgune asko daude, euren egileek denborapasarako eta inolako helburu praktikorik gabe sortuak. Sentimendurik oinarrizkoenak eragiteko xedea dute askok: barrea, nazka, harridura, beldurra... Ingelesez aurki daitezke gehienak, bizarre, weird, strange eta odd websites hitzak edozein bilatzailetan jarrita.

Webgune nazkagarriak atal handia osatzen dute eta normalean eskatologiaren entziklopedia osatzen duten irudi sinestezinak umorez tratatzen dituzte egileek. Hala ere, arlo honek muga egiten du sexuaren perbertsioekin lotutako irudi zoofilikoekin. Hauek gaitzagoak dira aurkitzeko baina pixkat ahaleginduz gero, komentariorik behar ez duten milaka argazki kausituko ditugu.

Zaletasun arraroak dituzten lagunen atala dugu beste alde batean. Zerura koeteak jaurtikitzea, odola edatea edo zomorroak jatea gustoko duten lagunen klub bitxiak topa daitezke. Hauek eta beste asko aurkitzeko leku interesgarria da Weird Links. Bertan, gainera, giza hezurrak, Los Angeleseko tanatorioko kamisetak edo hainbat lagun euren burua hiltzen ageri diren bideoak eros ditzakegu.

Beste webgune batzuetan albiste harrigarriak biltzen dira, munduan gertatutako pasadizurik bitxienak. Esaterako, Hildako bati telefono mugikorra jotzen hasi zitzaion hilkutxaren barruan, edo Bikote bat atxilotuta hegazkinean larrua jotzeagatik, ez zuten elkar ezagutzen. Horrelakoak aurki ditzakegu El Mundok zabaldu duen Insolito atalean. The Weird Sitek ere makina bat albiste harrigarri biltzen ditu, baita gure ordenagailura ekar ditzakegun soinu bitxiak ere.

www.weirdlinks.com
randysweb.com/weird
www.forkz.com/Recreation/Humor/Bizarre
completeidiot.com
www.theweirdsite.com
www.weirdwebsites.co.uk
www.el-mundo.es/insolito