Makrojaialdiak online

Udan ospatuko diren hainbat musika jaialdi sarean

Modako joera da, dudarik gabe, milaka lagun biltzen dituzten jaialdi erraldoi edo makrofestibalak antolatzea. Jaialdiok iragartzeko, bertan joko duten musikarien, zerbitzuen eta sarreren salneurrien gaineko informazioa emateko Internet erabiltzen dute jada hauetariko jaialdi gehienek. Hala ere, webguneen diseinuaren eta ematen duten informazioaren arabera, alde ederra dago batzuen eta besteen artean.

Diseinuan ausartena eta baliabide gehien erabiltzen duena Galiziako Compostela hirian uztailaren 13tik 15era ospatuko den Santi Rock jaialdiarena da. Shockwave teknologia erabiltzen du orrialdeak erakusteko eta itxura tekno-a ematen dion tipografia eta koloreak aukeratu dituzte diseinatzaileek.

Uztailaren 28tik 30era Kataluniako Rubi herrian ospatuko den U-zona Reggae festibala musika mota honetako garrantzitsuena da Espainiako estatuan, aurten ospatuko ez den Armintzako Txapel Reggaerekin batera. Lotura interesgarrien bilduma bat eskaintzeaz aparte, chat-erako gune bat eskaintzen du eta, bere denda birtualaren bidez, hainbat gauza erosteko aukera ere, festibalaren parafernalia eta diskak batez ere. U-zona Reggae-ren historia eta azken orduko aldaketen berri ematen duten beste atal batzuk ere badira bertan.

Abuztuaren 3tik 8ra izango den Benicassim-eko jaialdiko webgunera sartuta, edukiok ondo ikuskatzeko behar den plug-in egokia eduki ezik ezin izango dugu dena ikusi. Kataluniatik Asturiasera mugitu duten Doctor Music jaialdia uztailaren 21tik 23ra izango da, beti bezala mendi artean. Horrelako inguru batean ere ospatzen da gurean, Arrosako landetan, Euskal Herria Zuzenean. Hilaren 30an hasi eta uztailaren 2rarte iraungo duen festibalak badu leiho bat ziberespazioan eta bertan kultur ikuskizun erraldoi honen gianeko informazio guztia ematen dute antolatzaileek.

www.festival-ehz.com
www.santirock.com
www.festival-benicassim.com
www.uzonareggae.com
www.doctormusic.com
www.festimad.es