Web satirikoak

Aldizkari, komiki, fanzine eta parodiak amaraunean

Umore garratza duten webgune asko badira sarean. Honelako argitalpenak betidanik izan dira paperaren euskarrian baina gehienetan arazoak izan dituzte irauteko, ale kopuru txikia izanik publizitatea lortzeko eta inprimategietako gastuak ordaintzeko zailtasun handiak baitituzte.

Orain, askok sarean aurkitu dute orain arte diru faltak argitaratzea eragozten zien adierazpidea. Sarerako propio sortutako webgune franko dira, satiriko hitzarekin sailka daitezkeenak, honen baitan denetariko joerak dauden arren. Batzuk paperean argitaratzen diren aldizkarien weberako moldaketak dira, gauza batzuk gehituta, Bilboko "Karma Dice" kasu. Hori da ere "El Jueves" aldizkariaren kasua. Zehazkiago, aurkeztu berri duten webgune eraberrituak paperezko edizioaren aurrerapena baino ez dakar eta, beraz, irakurleak beti bezala kioskora joan beharko du aldizkaria eskuratzeko. Baina paperean ageri ez diren zenbait komiki badira edizio digitalean, "El Webes" izenburupean.

Bestalde, soilik bit-etan eta ez paperean argitaratzen diren agerkari batzuk badira. Gure artean, "Gente Pez" dugu horretan aitzindari. Inguruotako hainbat marrazkilariren istorioak eta iritziak aurki daitezke argitalpen digital honetan: besteak beste, Borja Crespo, Mauro Entrialgo eta Larryrenak.

Argentinan "La Cosa.com" aldizkariak arrakasta handia izan du eta, Espainian, estilo garratzagoa duen "Cibercerdo.com" aldizkariak ere irakurle asko baditu jada. Arlo politikoari aipamena egiten dioen libelo bat badugu gure artean, "Diario de Navarrra" izenburupean. Nafar egunkariari eta UPNren jarrerei iseka eginez haien politikaren kritika argia egiten du. Frantzian politikaren gaineko umorea egiten duen "Le Canard Enchaine" aldizkariak badu aukera txiki bat sarean ikusgai.

Gente Pez
www.gentepez.com
El Jueves
www.eljueves.es
Karma Dice
www.humorenlared.com
Diario de Navarrra
www.navarrra.net
Le Canard
www.electriccafe.org/Canard