Portalmania

Gai bakoitzak atari berezitua badu

Jada afizio bakoitzak badu Interneten haren gaineko informazioa ematen duen ataria. Espainian, haietako batzuk Portalitis webgunean bildu dira. Banan banan hartuta, gehienak ez dira, berez, atariak, berezituegiak baitaude arlo jakin batean. Gainera, atari batek hainbat zerbitzu bildu behar ditu izendapen hori edukitzeko. Hala nola, doako posta zerbitzua, unean uneko albisteak, eztabaidaguneak, chat-a, sarerako doako konexioa, eta bestelako zerbitzuak dira atari baten ezaugarri ohikoenak.

Atari independiente txikien bilgune honetan, besteak beste, burtsaren jarraipena egitea ahalbidetzen digun "bolsagrafica.com" webgunea aurki dezakegu. Bannerren trukea aurkituko dugu "cambia.net" helbidean eta aisirako denborapasak "dreamers.com" domeinuan.

Zuzenbidea gustoko –edo halabeharrezko– gaia dutenek elwebjuridico.com helbidean aurkituko dituzte hainbat baliabide. Musikariek, gitarra joleek batez ere, "guitarra.net" webgunean makina bat partitura dituzte, pop eta rock abesti ezagunak jotzeko.

Kirol arloan, "infodeporte.com" webguneak informazioa ematen du, "servifutbol.com" domeinuan bakarrik futbolaren gaineko informazioa aurkituko dugu eta "mercafutbol.com" helbidean futbolarien salerosketen merkatuan sartuko gara.

Informazio orokorrari dagokionez, "titulares.com" webguneak egunero sarean dauden egunkarien titularrak eskaintzen dizkigu, "enportada.com" webguneak Latinoamerikari buruzko informazioa aurkituko dugu eta "telele.com" helbidean telebisten programazio eguneratua dago, konektatzen garen momentuan bertan kate ezberdinetan dauden programak ezagutuko ditugu.

Gai bitxirik ere ez da falta webgune tematikoen zerrendatxo honetan. Esaterako, etxeko animalien lagunak "uauau.com" helbidean biltzen dira eta toreozaleak, berriz, "burladero.com" domeinuan.

Portalitis
www.Portalitis.com