The Sims

Benetako bizitzaren ispilu birtuala

Mundu birtualak sortu eta garatzen duten jokoak modan daude sarean. Baina batez ere modan dagoena sarea ordenagailu jokoak eguneratzeko eta lehiatoki bezala erabiltzea da. CDak disketea ordezkatu zuenean bazirudien amaitezinak zirela haren aukerak. Egun, txikiegiak geratu dira CDak eskaintzen dituen aukerak, baita askoz informazio gehiago dakarten DVDak ere. Jokoak gaurkotzeko modua eta askotan jolasteko modu bakarra Internetera konektatzea da.

Aipatu dugu hemen inoiz Ultima jokoa. Ertaroko mundu birtual bat zehaztasun handiz aurkezten digun rol joko zibernetikoa da. Beste batzuk ere badira, fama handikoak eta dirutza itzela mugitzen dutenak: Quake, Doom eta Diablo esaterako. Jokalariengan sekulako adikzioa sortzen duten joko hauek erabiltzaileen klubak eta aldizkari berezituak ere badituzte. Ultima jokoa milioi bat lagunek erabili dute inoiz eta sarerako konexioaren bidez gehienez 100.000 lagun bildu izan dira batera mundu mailako joko honen eskenatokietan.

The Sims dugu honelako jokoetan azkena, baina besteengandik ezberdintzen duena gaia da: mundu birtual exotikoak sortu barik EEBBetako hiri arrunt bateko benetako biztanleen bizitzak modu birtual baina koerente eta osatuan osatzen dituela. Norberak aukera ditzake bere pertsonaien itxura, ogibidea, soldata, etxebizitza, izaera eta beste osagarriak.

Paradoxa da gurea bezalako aspergarria eta ezatsegina izan daitekeen bizitza birsortzea baina ispilu surrealista horretatik agian hemen ikusten ez ditugun irakaspenak atera ditzakegu. Giza harreman guztiak ateratzen saiatu da Will Wrightek zuzendutako lantaldea, esaterako, homosexualitatea eta infidelitatea ere tratatzen dira. Gizakion alde irrazionala, biolentzia, azaltzen denean liskarra marrazki bizidunen umorez tratatzen da, horretarako dira ordenagailuak gu baino askoz arrazionalagoak, zibilizatuagoak.

Sarearen bidez beste familia batzurekin elkar eragingo dugu eta bertatik altzari, etxe, lanbide eta itxura fisiko berriak eskura daitezke.

The Sims
http://www.thesims.com