Artisten laguna

Gure sena garatzeko laguntza sarean

Idazleak eta musikariak, kantariak eta antzezleak bezala, jaio eta hezi egiten dira. Bien konbinaketa egokiak aterako ditu artista osoak, senak beti laguntza apur bat behar du eta. Heziketaren garrantziari erreparatu dioten batzuek Interneten bidez laguntza pixkat emango digute.

Musikari ona izateko, akademiaren batean eskolak hartzeaz gain, saretik laguntza baliagarria jaso dezakegu, net4music.com webgunean. Ekimen komertziala da eta beraz, zerbitzu batzuk ordaindu behar dira. Baina beste batzuk doakoak dira eta hor sarearen aukerak ondo baliatzen dituzte musikariari laguntzarik onena eskaintzeko. Partiturak eta MIDI artxiboak har daitezke bertatik. Partiturak gure ordenagailuan ikusi eta inprimatu ditzakegu. MIDI artxiboak, berriz, musikarako formato elektroniko estandarra dira. Teklatu batean edo ordenagailuan jo ditzakegu, bertan agertzen diren instrumentu birtualak aldatu eta beste hainbat aukera baditugu.

Bateria jotzeko eskolak ere ematen dituzte bertan bateria jole ezagunek. Erritmo ezagunak eta bariazioak, ematen dituzte partiturak eta guzti. Beste atal batean musikaren teoriaren gaineko ikasgaiak ematen dituzte: inprobisazioa, armonia eta beste. Grabaketa digitalei buruzko aholkuak ere ematen dituzte, musika egiteko ordenagailua erabiltzen dutenentzat baliagarriak.

Beste webgune interesgarri bat Escritores.org izenekoa da. Bertan, idazle izan nahi dutenei aholkuak eta baliabideak eskaintzen zaizkie. Atal batean edizioaren urratsak eta sekretuak azaltzen dira: elkarteak, agenteak, literatura sorkuntzari buruzko aldizkariak, lehiaketak... Beste batean tailerra aurkituko dugu hainbat ikastarorekin: idazketa dramatikoa, eleberrigintza, ipuingintza, gidoigintza eta beste ikastaro telematiko batzuk. Zuzenketa zerbitzua ere badute eta idazleentzako laguntza emango duten hainbat liburu baliagarri ere bai. Azkenik, testuok sarearen bidez publikatzeko eta saltzeko edo gutxienez ezagutarazteko laguntza ematen dute.

Net4music
www.net4music.com/
Escritores
www.escritores.org