Emeki sareratzen

Emakume gutxi dago Interneten oraindik

Gizonezkoak nagusi diren mundua dirudi ziberespazioa. Inkesten arabera erabiltzaileen laurdena baino gutxiago dira emakumezkoak eta edukietan ere hori islatzen da. Sareko arlo komertzialan, handienean, gizonezkoentzat zuzendutako edukiak –sexutik hasita, noski– eta ustez publiko neutro batentzat eginikoek ez dituzte gehienetan emakumeen gustuak kontutan hartzen, ez baitira haientzat sektore garrantzitsua.

Baina portal tematikoen garapenak argi uzten duenez, sarea bereizten ari da publiko-xede konkretuetan. 1998an atari orokorrak agertu eta nagusitu ziren, Yahoo eta halako portal erraldoien urtea izan zen hura. Iaz, berriz, portal tematikoena izan zen: sukaldaritza, zinema, motorra, haurrak, gazteak, homosexualak... sektore guztientzako portal bereziak sortu dira. Joera honek jarraitzen du eta, hala, Espainian sortzen azkenetakoa emakumeentzako portala izan da, nosotras.com izenekoa.

Honen sortzaile Maria Garcia-Palenciak dioenez, «emakumeentzat erabilgarri izango den tresna bat sortzea» dute helburu portal honen bitartez: «Informazioa eta zerbitzuak aurkituko dituzten gune erabilgarria nahi dugu, marujeoa eta bihotzeko berriketak baztertuta». Hala ere, edukiak ikusita, ez dirudi feminismoaren aldarrikapenak tokirik duenik bertan. Are argiago uzten du Mariak berak: «Ez dugu feministak izan nahi».

Baina nosotras.com ez da emakumeek sarean duten isla bakarra. Euskaraz feminismoaren gainean dagoen informazio apurra Euskal Sare Gorriaren baitan aurki daiteke. Ingelesez, askoz gehiago dago, Off Our Backs aldizkari ezagunetik hasita, Lesbian Feminism webguneraino. Emakume askok artea dute adierazpide eta sarea hedabide, Tina Laporta artista kasu. Honen inguruan, ziberfeminismoaren kontzeptua erabiltzen dute zenbait sortzailek.

Nosotras.com
www.nosotras.com
Euskal Sare Gorrian
http://www.basque-red.net/eus/patrieus/patrieus.htm
Off our Backs
http://www.igc.apc.org/oob/
Lesbian feminism
http://www.grrltalk.net/dykefeminism/
Tina Laporta
http://www.users.interport.net/~laporta/