Zentsura gaindituz

Debekatutako hainbat bideo sarean ikusgai

Internet zentsurarik onartzen ez duen eremua ei da, autozentsura kenduta. Hala ere, portaera bategatik jazarriak izateko arriskutik ez gaude salbu, naziortean zailagoa bada ere. Baina adierazpen askatasunaren aldeko beste ezaugarri pisudun bat badago: anonimotasuna. Izengabeak dira webgune asko eta beraz, arduraduna herrialde berean egon arren poliziak ez du nor den jakiterik izango.

Hori guztia profitatuz, badira testu debekatu asko sarean baina oraingoan bideoak aipatuko ditugu. QuickTime, Windows Media edo RealVideo formatoetan bideo asko topa daitezke sarean. Wired aldizkarian CensorSheep aurkituko dugu, sorkuntza digital honetan zentsura eta ardiak biltzen dira izenburuko hitz jokoan bezala.

Hilaren 27an Bilbon izango dugun Marilyn Manson pertsonaia satanikoak ere jasan du zentsuraren kolpea. Bere bideoklipak gogorregiak dira zenbait telebista katetan eskaintzeko. Disposable Teens azkenekoa ere debekatu egin dute EEBBetan baina sarearen bidez edonoren esku dago, zentsoreek eskua sartu ezin duten lekuetan. Esaterako, loquesea.es musika atari alternatiboan aurkituko dugu.

Sarean dabilen beste bideklip batean Gran Hermanoko irabazlea ageri da, programa famatu hori telebistan ematen ari zirela, zakila atera eta etxe hartako mahai baten gainean jartzen. Beste batean ustez Malena Gracia famatua prostituzioa egiten jasotzen duen bideoa damaigu Rodriguez Menendez abokatuak zuzentzen duen Digame aldizkari sentsazionalistak.

Zentsurarik gabeko eremu libre horretan ere benetako basakeriak ikus daitezke: pertsona baten dekapitazioa jasotzen duen bideoa edota bideo sorta zabala, zein baino zein higuingarriagoa.

www.loquesea.es
www.revistadigame.com
www.wired.com