Festibal birtualak

Glastonburykoa sarean soilik egin dute

Sonar igaro ostean udako jaialdi erraldoien txanda da, osagarri hauekin: Musika eta eguzkia, izerdia eta edari freskoak, oihaletxeak eta natura. Azterketak pasatu ostean neguko kontzertu aretoak utzi eta estalpetik aire libre gosea asetzera pasatzen da jendea.

Gure inguruotan duela sei urte hasi ziren horrelakoak egiten. Benicassim-ekoak eta Festimad-ekoak izan ziren aitzindariak 1995an, jada mitikoak ziren Glastonbury edo Reading gisako makrojaialdiak egiteko ideiarekin. Handik urtebetera gurean Euskal Herria Zuzenean sortu zen, asteburu honetan sei urte beteko dituen Arrosako jaialdia. Ondoren beste izen batzuk sortu dira, Derrrame rock, Esparrago rock, Bad music... Jaialdi berezituak ere badira, Monegros desertuan egiten den Groove Parade jaialdi elektronikoa edo U-zona reggae kasu.

Baina kudeaketak eta ekonomiaren aurreikuspenek askotan huts egiten dute, dirua galeraziz. Beste batzurekin lehiatu beharrak, ekologisten salaketak zenbait kasutan. Esaterako, Doctor Music festibala arrazoi ekonomikoak direla eta ez da aurten ospatuko. Escalarren hasi ziren egiten, Lleidan, eta hasierako edizioak arrakastatsuak izan ziren baina diru galera handiak izan dituzte geroago eta iaz jaialdia Asturiasera eraman izanak ez du lagundu.

Hala ere, Doctor Music-ek Internet erabili zuen bere burua iragartzeko eta bertan gelditu da, musikari buruzko ataria bilakatuta. Orain nekez aurkituko dugu jaialdiari buruzko aipamenik bertan. Gorabehera ekonomikoek Glastonburykoa ere bertan behera geratzea eragin dute, antolatzaileek diotenez, iaz segurtasun hesiak apurtu eta ordaindu gabe sartu ziren milaka lagunen erruagatik. Haatik, ez da erabat desagertu, birtuala bihurtu baizik. Ez da jaialdirik egon baina irandakoen kontaketekin osatu dute egitaraua, alegiazko aukera eginez.

www.festival-benicassim.com
www.festival-ehz.com
www.doctormusic.com
www.glastonburyfestivals.co.uk
www.efestivals.co.uk
www.thegrooveparade.com