Carnivore eta ludoteka

Internautek programekin elkar eragiten

Bartzelonako Art Futura, etorkizuneko artearen gaineko bilkura garrantzitsua, duela bi aste izan zen Bartzelonan, hamairugarrenez. Badirudi aurten indarra hartu duela, hainbat proiektu interesgarri erakutsiz. Tartean, Carnivore programaren moldaketa bitxi bat, Bartzelonako Area 3 kolektiboaren eskutik. Carnivore FBIk sortutako programa bat da, internauten nabigazioan eta posta elektronikoan bidali eta jasotzen diren hitzak eta internauten mugimenduak kontrolatzeko sortua. «Orwel eta Ballard-en aurpegirik makabroena erakusten duen polizia-gizartea» ordezkatzen du, Area 3 taldekoen esanetan, software honek.

Radical Software Group (RSG) taldeak hartu eta moldatu zuen Carnivore, informazio digitala irudi eta soinu bihurtzeko. Hainbat artistek hartu eta moldatu dute RSGren softwarea, bakoitzak bere itxura emanez, tartean Area 3ekoak. Hauen lanak horma bat erakusten digu, eta artista batzuk grafitiz bandera batzuk margozten haren gainean. Une jakin horrean konektatuta dagoenaren IP helbidea datu base batekin erkatu eta horma hori bere herrialdeko banderaz nola margozten duten ikusiko du. Area 3ekoek diotenez, «banderen, koloreen eta ehunduren collage-ak zera erakusten du: kontrol bakarreko ahaleginak gorabehera, Internet heterogeneoa dela». Hala ere, aniztasun horretan ez ei dago lekurik euskaldunontzako, ikurrina barik espainiar eta frantziar banderak aurkituko baititugu geuk erabiliz gero.

RSGren webgunean, hala ere, programa hori jaitsi eta moldatu ahal dugu hauek egin duten moduan. Hala beste moldaketa batzuk aurkituko ditugu, Guernica izenekoa eta beste batzuk, internautaren nabigazioa islatzen dutenak.

Hurbilagora etorrita, joko batzuk ludoteka.com domeinuan euskaraz aurkituko ditugu, joko sorta ederrarekin. Sarearen bidez eta doan beste internauta batzuren aurka mahai eta karta jokoetan aritzeko aukera ematen digu. Esku hartzeko beharrezko eta ezinbesteko gauza bakarra izena ematea da, ondoren edozein joko hartzeko. Lehiakiderik eduki ezik ordenagailuaren aurka lehia gaitezke edo, demo moduan, ordenagailua bakarrik jokatzen ikusi. Ludoteka gaztelaniaz, frantzesez, ingelesez eta euskeraz dago, edozein momentutan alda dezakezu hizkuntza, sarrerako orrira itzuli gabe.

Amaitzeko, bertoko webguneetan geratuz, Zinebi jaialdiaren webgunea bisita dezakegu, hilaren 25etik 30era izango den zine dokumental eta laburraren gaineko jaialdiaren gaineko jakingarriak gaztelaniaz bakarrik aurkituko ditugu zinebi.com domeinuan.

www.artfutura.org
rhizome.org/carnivore
www.ludoteka.com
www.zinebi.com