Freak mundu bizarro-a

Web harrigarri, bitxi, nazkagarri eta barregarria

Umorea, eskatologia, sexua, absurdoa, heriotza, zoofilia... Horrelako elementuak nahasten dira webgune askotan, proportzio ezberdinetan. Orokorrean web freaky-ak esaten zaie, ganorazko mezu askorik ez dute baina egileen paranoiak edo sormenaren joerak islatzen dituzten webgune harrigarri eta bitxiak izan ohi dira.

Sarearen lehen garaietatik izan dira web bizarroak esaten zaien horietakoak, webgune akademiko eta politikoekin sareko trafikoa partekatzen baina sarearen alderdi underground-ean. Egun, ordea, publizitatez jositako webgune komertzialetan ikus ditzakegu horrelako edukiak eta nahiko arrakastatsuak dira: emakume bat bere buruari txiza egiten, trenak harrapatutako jendea... Eurena Arte groteskoaren museoa dela diote quefuerte.com-ekoek. Egia esan, bideo eta argazki gogor batzuk erakutsiko dizkigute webgunean: bideo nazkagarri batzuk, benetako istripuen irudiak eta higuingarri baina gizaki askorentzat aldi berean erakargarri diren horrelako gauza asko.

Horrelako webgune komertzialetan sarri iragarrita ageri diren Operacion Polvazo eta horrelako izenen atzean sarritan iruzurrak izkutatzen dira, web horietan sartzean norberari ezertarako galdetu barik deskargatzen baita .exe artxibo exekutagarri bat, dialer izenaz ezaguna. Telefonoaren bidez Internetera konektatzen diren askori sekulako kaltea eragin die eurek konturatu gabe. Kontua da, oharkabean jaitsi dugun exekutagarri horrek modemari telefono batera deitzeko agintzen diola, normalki hegoaldean 906 zenbakiekin hasten den telefono berezi horietako batera. Minutu batzuren buruan sekulako dirutza gastatuko dugu eta ordu batzuk konektatuta egonez gero faktura erraldoiak hel daitezke gure etxera.

Gure artean ere badira horrelako freak-ak. Esaterako, Natxo Allende bilbotar marrazkilari polemikoak pornofreak eremua zabaldu du bere bideoekin putalocura.com webgunean, bera pailazoarena egiten agertzen den bideo porno erridikuluak jarrita. Historio harrigarriak, txikitako marrazki bizidunetako musikak eta freakolinks izenpean freak lotura sorta handia ditu metrobilbao.com domeinuagatik izandako aferagatik ezagunagoa egin den morroiak. Baina, nonbait, dirua egin behar du Allendek eta bere bideo guztiak ikusi nahi dituenak dialer bat jaitsi behar du.

Loturetan, aldiz, webgune interesgarriak ikus daitezke, esaterako toxeiro.com-en galiziar gizon baten istorioa kontatzen da, nola neska bik mozkortu zuten eta diru guztia lapurtu zioten. Beste batzuetan argazki sorta bitxiak daude: batean jende guztia botaka ari dela, bestean komunzuloen argazki galeria, bestean Barbie larrua jotzen...

www.putalocura.com
www.toxeiro.com
www.quefuerte.com